♠♠♠اتيكيت مقابله العريس لاول مره♠♠♠

♠♠♠اتيكيت مقابله العريس لاول مره♠♠♠

ان شاء الله هنتكلم النهاردة عن موضوع ممتع و شيق و بداية لحياة جديدة كل بنت بتتمناها و هي

<<استقبال العريس>>

أولا كده نتفق ان شعارنا هو _ كوني طبيعية للوصول إلي عش الزوجية – (بقيت شاعرة ياناس)

هنقسم الموضوع علي أجزاء و هأركز بالتفصيل الممل علي كل جزء
ان شاء الله يكون موضوع مفيد

اولا : تجهيز البيت

طبعا بيكون فيه اتفاق بين الطرفين اذا كانت الزيارة الأولي في البيت أو في مكان عام
لو الزيارة هتكون في البيت لازم نعمل الأتي :
- النطافة البيت كله يكون فلة شمعة منورة

أول مكان الريسبشن نطيف و الستائر مغسولة
التواليت نطيفة و فيه فوطة جديدة و صابونة جديدة وقعدة التواليت مرفوعة و الأرضية ناشفة تماما و مراية الحمام منورة و بتبرق
-رتبي غرف النوم و خصوصا غرفتك
ليه بقا عشان ممكن يبقى معاه اخته او مامته ويقولك سيبوا الرجاله يقعدوا لوحدهم شويه وتدخلوا انتو الاوضه وتخليكى تكسرى البندقه طبعا بهزر قال بندقه قال
المهم جداااااااااااااا
ريحةةةةةة البيت مش تكون ريحته طبيخ و مكتم
هوي البيت و عطريه و ياريت تبخريه و حطي نقطتين مسك علي البخور و تمتعي بأحلي ريحة

المطبخ
تكوني مجهزة الصواني و كوبيات الشاي و كاسات العصير و مفارش و الشوك و السكاكين و الفاكهة و الحلويات و مطلعهم علي رخامة المطبخ عشان كل حاجة تكون جهزة و ماتاخدش وقت منك لما يكونوا موجودين

بصوا يابنات التفاصيل ديه مهمة ممكن تكوني مش واخدة منها بس حماتك أكيد هتاخد بالها منها و بتفرق جدا في انطباعها عنك

تاني حاجة و أهم حاجة انتي ياعروسة
اللبس
ابعدي عن البنطلون انتى مش راحه تلعبى فى الاستاد ياختى
او اى لبس كاجوال

طيب نلبس ايه ياأمورة ؟؟؟
dress– لانك في الوقت مهم تكون أنثي و ليدي شيك مش بنت كاجوال أو طالبة جامعة ، لألألألألأ
أنثي ، و ديه أكتر بتشد الرجل... الأنوثة –

و كمان لو انتي تخينة شوية ياريت يكون الفستان واسع عشان يداري تفاصيل الجسم المليانة

مهم جدا الشوز يكون كلاسيك و بكعب مش عالي max. 3 سم

المكياج
بلاش البودرة المائية – بلاش الجليتر اللي فوق العين –بلاش الروج الأحمر – بلاش الeyeliner -
هو مش جاى يشوف عروسه المولد ياوختشى
هو يدوبك هتحطى رتووش بسيطه جداااا

هنحط ايه ياعروسة :::

كونسيلر concealer عشان لو فيه هالات سودا تحت العين أو فيه حبوب في الوش

Blusher بلاشر بسيط علي تفاحة الخدود و كحل و eye shadow خفيف جدا ولونه قريب للبشره مش تحطيله احمر واخضر وبروبرق وتبقى شبه الكلاون

روج بسيط و يامثال لو تستغني عنه و تحطي lip balm زي labello اللي بالفراولة لونها رقيق جدا و عليه lip gloss و بس ، عشان يكون شكلك طبيعي أكتر و simple
و يبقي جميل جدا لو كنتى عامله ماسك تفتحيح قبلها عشان يبقى وشك بدر منور

بلاش برفيوم خااااااالص مش هتكون بدايتها ذنوب

و نفسي كمان ماتحطيش ميك خالص بس طبعا لو قولت كده هتكهرب او أضرب بالنار

تالت جزء استقبال العريس

أول ما الباب يرن باباكي أو أخويكي الكبير يفتح الباب

تدخلي انتي بعد شوية و بأبتسامة تقولي (السلام عليكم و رحمة الله) و بلاش ( مساء الخير )

سلمي علي مامته و أخته لو معاه ، عايزة تسلمي علي باباه براحتك بس العريس لألألألألألألألألأ ( قال يعني مكسوفة )

بلاش تبصي للعريس بطريقة واضحة ممكن نظرة خافتة و من ورا الباب بصي براحتك

الأكل:::
هنقدم ايه للأكل
انا شايفة انه انتي اللي مفروض تقدمي الحاجة و تكون كالتالي

صينية شيك – مش بلاسيتك طبعا – عليها عصير علي الأقل نوعين مختلفين في كاسات ومعاهم اى فاكهه
لو هتقدمي فاكهة زي الموز يفضل يكون الموز علي طبق و جنبه طبق فاضي عشان القشر
بلاش جاتو من اول مقابله احسن يقولوا دول ماصدقوا الجاتو ده لما يحصل نصيب
اول ما يخلصوا في ثانية تشيلي الصينية و الكاسات الفاضية ( يعني انتي ست بيت شاطرة )

بعد شوية ممكن تعملي شاي أو قهوة حسب رغبتهم
طيب بالنسية للسكر مش هتسألي كم معلقة سكر؟؟؟؟؟ لأ طبعا حطي الشاي في الكوبيات علي صينية تانية غير الأولانية و سكرية و ملاعق لتقليب الشاي و ياريت لو الشاي بفتلة تحطي كلينكس تحت المعلقة بحيث انه يقلب بالمعلقة و لما يخلص يحط الفتلة علي الكلينكس

الكلام

اللي هيكون معاه محور الحديث باباكي أو أخوكي الكبير و أبعدي تماما عن الكلام في المجالات اللي فيها جدال زي السياسة
(طبعا مصر كلها دلوقتي نشطاء سياسيين- ربنا يصلح الحال-)

لو حصل نقاش بينك و بين العريس في موضوع و فيه تعارض بين وجهة نظرك و نظره (اعملي نفسك متقبلة كلامه و مقتنعة و خلاص ) أصل يقول من الأول هتعمل راسها براسي

حاولي مثلا تلمحي أنكي بتحب الأطفال و شغل البيت و بلاش تقولي انكي مش بتعرفي تطبخي ( و الهبل اللي ساعات الواحد بيسمعه ) خليكى وسط

وطبعا اعملى اللى عليكى وفكرى بعقلك اللى ربنا اداهولك وشوفى هيناسبك ولا لا متوافق معاكى فكريا ولا لا مرتحاله ولا لا
وطبعا تستعينى بالله لان ربنا هو اللى هيدلك وربنا يرزق كل البنات بالزوج الصالح زى مايكون بتتمناه ويكتب لها فيه الخير
اللهم امين